Teksa shqiptarët kërkojnë dorëheqjen e qeverisë, Edi Rama del dhe shpalos ‘shpikjen’ e radhës për të zgjidhur hallet e shqiptarëve, këtë herë të pagëzuar me emrin ‘Dëmi im’.
Kryeministri Edi Rama njoftoi se, duke nisur nga dita e sotme, çdo biznes i vogël që ka pësuar dëme nga aktet e dhunës gjatë protestave do të mund t’i deklarojë ato përmes një dritareje të posaçme në platformën e-Albania, të quajtur “Dëmi im”. Bizneset duhet të regjistrojnë të dhënat e tyre, NIPT-in, vlerën e përllogaritur të dëmit dhe të ngarkojnë fotografi apo dokumente të tjera që vërtetojnë dëmtimet.
“Do t’i kthejmë këto gërmadha verbërie në shëmbëlltyra të forcës sonë për të ecur përpara”, deklaroi kryeministri.
Rama bëri të ditur se 10 grupe verifikimi nga administrata tatimore do të dalin në terren për të evidentuar dëmet, ndërsa pas përfundimit të verifikimeve do të hartohet një regjistër i plotë për t’u ardhur në ndihmë bizneseve të prekura.
“Po bëjmë verifikime. Kemi bërë gati një dritare që do të shfaqet tek e-Albania, ku do të mund të regjistroheni duke futur të gjitha të dhënat: emër, mbiemër, identitetin dhe NIPT-in. Pastaj e-mailin, numrin e celularit, të dhëna si sipërfaqja, kompania e sigurimit, parashikimi i dëmit dhe më pas do të ngarkoni dokumentet, që janë pamjet, bashkë me faturat. Do të shikohet edhe raporti me shtetin sa i përket pagesave të detyrimeve. Pasi të bëjmë verifikimet, do të mbledhim një regjistër të të gjitha dëmeve. Ne do t’ju vijmë në ndihmë të gjithëve.
Çdo biznes që është dëmtuar nga vala e dhunës së verbër ka një dritare ku do të mund të regjistrojë dëmin. Siç u thashë miqve të dëmtuar në këtë biznes të vogël, 10 grupe verifikimi nga Tatimet do të jenë në terren për të mbledhur të dhënat e dëmeve mbi biznesin e vogël në kryeqytet. Do t’i kthejmë gërmadhat e verbërisë në shembuj të forcës,-tha Rama.
Kryeministri Edi Rama deklaroi se i respekton studentët dhe i konsideron ata si forcën që e shtyn vendin përpara, duke theksuar se zëri i të rinjve që protestojnë do të dëgjohet me respekt. Megjithatë, ai paralajmëroi se nuk do të lejojë që siguria e tyre të rrezikohet për interesa të caktuara, duke akuzuar atë që i quajti “duar të pista” dhe “duar të huaja” se kërkojnë të shkaktojnë shkatërrim.
“I respektoj studentët, i çmoj si motori i të parës, si shtysën për të ecur përpara. Zëri i tyre, i të rinjve që sot ka nevojë të protestojë, do të dëgjohet me respekt. Por pikërisht se të rinjtë janë e ardhmja jonë, s’do të lejoj që të rrezikohet askush. As për përfitime të atyre duarve të pista që janë kthyer për të shkatërruar, as ato duar të huaja. Përgjegjësia ime është më e qartë në këto orë të vështira. Të mbroj qytetarët tanë, të garantoj drejtësinë bashkë me këtë qeveri të shumicës, që ka të qartë mandatin e saj, atë të Shqipërisë së vitit 2030”, tha Rama.
