Edi Rama ka pranuar për herë të parë përpara ekipit të tij se mbështetja për Partinë Socialiste është më pak se gjysma e votuesve.
VNA, verifikoi në dy burime të besueshme këtë deklaratë të kryeministrit.
“Mbështetja për Partinë Socialiste është 49% e votuesve. Kjo shifër nuk ulet, pavarësisht të gjithave”.
Edhe pse burimet saktësuan se Edi Rama e dha këtë shifër si një garanci apo valvul sigurie për stabilitetin e pushtetit të tij në çdo rrethanë, ky pohim në vetvete dokumenton se kryeministri e pranon se është pakicë, pavarësisht se manovrat elektorale i garantojnë atij pushtet të fortë.
Megjithëkëtë, në një reagim gati kaotik, me goditje nga brenda e jashtë partisë, dhe me 5 orë mbledhje ku ju mbajti referat leksione mllefi e kritike, Edi Rama po provon se po vepron në panik, dhe se nuk ka një dorë strategjike që të menaxhojë krizat e tij si dikur.VNA.al
Ka përfunduar pas më shumë se një ore mbledhja e zhvilluar në selinë rozë mes kryeministrit Edi Rama, drejtuesve politikë të qarqeve dhe ministrave të kabinetit qeveritar. Takimi i cili u zhvillua me dyer të mbyllura, u përqendrua kryesisht te situata politike në vend, protestat e fundit dhe angazhimi i strukturave të Partisë Socialiste në terren.
Sipas burimeve, gjatë diskutimeve kryeministri Rama e ka vendosur theksin te çështja e protestave, duke i cilësuar ato si pjesë të një “lufte digjitale”, ndërsa ka kërkuar nga drejtuesit politikë dhe deputetët që të jenë më pranë qytetarëve dhe problematikave të tyre të përditshme.
Një pjesë e rëndësishme e mbledhjes i është kushtuar komunikimit me qytetarët dhe identifikimit të shqetësimeve reale në komunitete. Rama ka kërkuar që deputetët të njihen nga afër me problematikat që lidhen me infrastrukturën, shërbimet publike dhe çështje të tjera që prekin jetën e përditshme të qytetarëve.
Po ashtu, kreu i qeverisë ka ritheksuar se zyrat e deputetëve duhet të jenë gjithmonë të hapura dhe funksionale, në mënyrë që qytetarët të kenë mundësi të paraqesin shqetësimet dhe kërkesat e tyre. Në të njëjtën linjë, ai ka kërkuar shtimin e takimeve në terren nga të gjitha strukturat e Partisë Socialiste, me synimin për të forcuar kontaktet me komunitetin dhe për të adresuar më shpejt problemet e evidentuara.
Pas përfundimit të mbledhjes, kryeministri Edi Rama u pa duke dalë nga selia rozë i shoqëruar nga kreu i Grupit Parlamentar të Partisë Socialiste Taulant Balla. Ky i fundit e shoqëroi deri pranë automjetit të tij, ku të dy u përshëndetën ngrohtësisht para se të vijonin me axhendat respektive.
Rama nuk dha asnjë deklaratë për mediat që e prisnin jashtë selisë së Partisë Socialiste. Ai u mjaftua vetëm me një përshëndetje me dorë në drejtim të gazetarëve, për t’u larguar më pas drejt një takimi tjetër të planifikuar në axhendën e tij.
