Anasayfa » Elbasani në duart e kr*mit, dosja e SPAK që kërcënon kupolën socialiste

Elbasani në duart e kr*mit, dosja e SPAK që kërcënon kupolën socialiste

Elbasanit i duhet një ndryshim rrënjësor në drejtimin politik të qarkut, me një person që ka ndikim dhe autoritet, pa qenë nevoja që kryeministri të ulet në gjunjë para bandave kriminale për të siguruar karrigen dhe votat e partisë.

Bandat e kokainës që kontrollojnë Elbasanin, përgjimet e SKY ECC ku përmenden lidhje me politikën, biznesmenët e denoncuar për pazare elektorale dhe dosja e blerjes së votave që ka mbërritur te deputetët socialistë. Sipas burimeve, brenda nëntorit priten zhvillime të forta në SPAK.

Edi Rama rrezikon të marrë një goditje të rëndë nga Elbasani, qarku ku bandat kriminale kanë luftuar për kontrollin e territorit, biznesmenët janë denoncuar për ndërhyrje në zgjedhje dhe zyrtarët socialistë që kanë përdorur deri edhe bukën e familjeve të varfra për të siguruar vota.

Sipas burimeve, brenda muajit nëntor priten zhvillime të rëndësishme në hetimet që lidhen me Elbasanin, me pasoja të rënda për njerëz të politikës dhe bosëve të krimit. Thirrja e deputetes Sara Mila në SPAK ka rikthyer në vëmendje skemat e blerjes së votave, ndërsa dosjet e SKY ECC kanë ekspozuar prej kohësh depërtimin e organizatave kriminale në institucionet shtetërore.

Rama ka ndërruar drejtues politikë, ka shpërndarë poste dhe ka kërkuar mandate në Elbasan, ndërkohë që SPAK ka zbuluar një organizatë kriminale që synonte të kontrollonte një pjesë të Shqipërisë së Mesme, duke korruptuar policë, njerëz të drejtësisë dhe funksionarë të tjerë.

Çështja që rëndon mbi kupolën socialiste është nëse pushteti elektoral i bandave është përdorur për të bërë pazare me njerëzit e qeverisë, duke shkëmbyer ndikimin mbi votuesit me favore dhe mbrojtje institucionale.

Nga kokaina te pazaret për mandatet e PS-së
Fiks para 2 viteve, SPAK goditi një organizatë kriminale që kishte ndërtuar fuqinë e saj mbi trafikun ndërkombëtar të kokainës, dhunën dhe korrupsionin e funksionarëve shtetërorë. Përgjimet e SKY ECC zbuluan jo vetëm përplasjet mes grupeve rivale, por edhe përpjekjet për të ndërhyrë përmes presionit ose rryshfetit, në polici, drejtësi, media dhe vendimmarrjen institucionale.

Në komunikimet e siguruara nga dosje të SPAK të lidhura me Elbasanin janë ngritur pretendime për kontakte me nivele të larta të PS-së. Një nga episodet më të rënda lidhet me një ofertë të pretenduar për sigurimin e nëntë mandateve parlamentare, në këmbim të ndërhyrjeve kundër rivalëve kriminalë.

Edhe pse një marrëveshje e tillë nuk rezulton e provuar, pretendimi zbulon natyrën e pazareve që njerëzit e krimit dyshohet se kërkonin të realizonin përmes ndikimit të tyre.

Bandat nuk synonin vetëm të sundonin rrugët e Elbasanit. Sipas dyshimeve të ngritura nga komunikimet dhe denoncimet, kontrolli i territorit mund të shndërrohej në mjet për të negociuar me pushtetin. Kush garantonte vota, kërkonte ndikim. Kush siguronte mbështetje, pretendonte favore.

Në këtë histori shfaqet edhe hija e Taulant Ballës, emri i të cilit është përfshirë në denoncimet për lidhjet e politikës me grupet kriminale të Elbasanit. Raportimet mbi komunikimet në SKY ECC kanë ngritur pretendime për kontakte dhe interesa elektorale të periudhave të mëparshme, pa provuar përfshirjen e tij në blerjen e votave në zgjedhjet e kaluara.

Në Gjocaj të Peqinit, numri i familjeve përfituese të ndihmës ekonomike u rrit nga 110 në 320 përpara zgjedhjeve të 11 majit 2025. Në materialet hetimore rezulton se 55 nga 60 familje të përzgjedhura për verifikim u përjashtuan nga skema në maj dhe qershor 2026.

Në një prej komunikimeve të sekuestruara, një qytetar i kujtonte administratorit votën që kishte dhënë, ndërsa ankohej se nuk kishte marrë pagesën e ndihmës ekonomike. Një mesazh që tregon sa ngushtë dyshohet se ishte lidhur përfitimi social me interesin elektoral.

Për këtë histori, Sara Mila u paraqit në SPAK më 11 nëntor, ku deklaroi se ishte pyetur si person në dijeni. Në komunikimet e publikuara përmenden kërkesa për përfshirjen e familjeve në skemën e ndihmës ekonomike, ndërsa burimet e Pamfletit kanë ngritur dyshime se hetimet prekin edhe interesat pasurore të familjes së deputetes.

Në të njëjtën dosje del një komunikim ku përmendet një person me emrin Saimir, që rezulton të jetë deputeti Saimir Hasalla. Ndërkohë, administratori Alken Çerma dhe drejtoresha Etleva Mezini dalin në materialet për ndërhyrjet në listat e ndihmës ekonomike. Sipas deklarimeve të Çermës, Mezini kishte kërkuar shtimin e përfituesve gjatë periudhës elektorale. Kështu, një skemë sociale e financuar nga taksat e qytetarëve përfundoi nën hetim për përdorim të dyshuar në shërbim të votave të PS-së.

Drejtuesit politikë pa autoritet para bandave
Për zgjedhjet e fundit, Rama ia besoi Elbasanin Arbjan Maznikut, ndërsa në ekipin elektoral përfshiu edhe Bora Muzhaqin. Të dy u përmendën vetëm për mobilizimin e administratës në favor të socialistëve.

Në bashki, Gledian Llatja ka administruar marrëdhëniet me bizneset përfituese të tenderëve, lejeve dhe kontratave publike. Pamfleti ka denoncuar më herët një mekanizëm mbledhjeje fondesh elektorale nga biznesmenët që kishin interesa me pushtetin vendor.

Rama mund të ndërrojë drejtuesit politikë sa herë t’i duhet, por ndryshimi i emrave nuk jep përgjigje për marrëdhëniet që kanë krijuar strukturat e pushtetit me interesat ekonomike dhe rrjetet e dyshuara kriminale.

Biznesmenët që shfaqen pas fushatave dhe tenderëve
Gjergj Luca nuk ka pasur nevojë të fshihet pas ndonjë zyre partie për të treguar mbështetjen ndaj Ramës. Në fushatën e vitit 2025 doli hapur në krah të kryeministrit, ndërsa në vitin 2021 ishte denoncuar nga PD për një skemë të pretenduar blerjeje votash përmes ndikimit mbi punonjësit. Në të njëjtën periudhë, Berisha publikoi akuza se persona të lidhur me bandat kriminale ishin strehuar në resortin e Lucës në Labinot, pas ngjarjeve të përgjakshme në Elbasan, ku u vra Pjerin Xhuvani.

Miliona euro tenderë publikë kanë përfituar edhe Vëllezërit Hysa, të cilët, vetëm pak ditë përpara zgjedhjeve të 11 majit 2025, përfunduan në një dosje penale për asfaltimin e rrugëve në Belsh. Prokuroria e Elbasanit urdhëroi ndalimin e Besnik Hysës dhe administratorit Dhiogjen Kristo, pasi dyshonte se punimet, të kryera pa projektin e miratuar, ishin përdorur për qëllime elektorale. Kompania, që prej vitesh përfiton fonde nga institucionet shtetërore, u gjend kështu në një hetim ku asfaltimi i rrugëve në prag të votimit dyshohej se ishte kthyer në instrument për sigurimin e mbështetjes elektorale.

Në prill 2025, BKH kontrolloi edhe ambientet e biznesit të Nazif Bajramit. Hetuesit shqyrtuan lidhjet e dyshuara të operatorëve ekonomikë me rrjetet kriminale të Elbasanit dhe përfitimin e kontratave publike. Bajrami N ishte një prej kompanive që kishte marrë fonde nga institucionet shtetërore.

Në të njëjtin aksion u përmend edhe “ushtari” i bandave dhe pronari i basteve ilegale Marenglen Çoku. Kontrollet e BKH-së në ambientet e biznesit të tij u raportuan në kuadër të hetimeve për marrëdhëniet e dyshuara mes operatorëve ekonomikë dhe organizatës kriminale të Elbasanit. Për Çokun, kontrolli i kontratave dhe kontakteve të biznesit merr rëndësi edhe përballë denoncimeve të përgjithshme për blerje votash në qark.

Me tenderët miliona euro, në këtë rrjet interesash ekonomike shfaqet edhe Eral Myftaraj. Pamfleti ka raportuar rreth 50 milionë euro kontrata për METEO dhe mbi 8 milionë euro për AL-MEXWOOD gjatë disa viteve, duke denoncuar marrëdhëniet e këtyre kompanive me institucionet dhe dyshimet mbi mënyrën e përfitimit të fondeve publike.

Ndërsa deputetja Sara Mila jepte shpjegime në SPAK, bashkëshorti i saj Aleksandro Bardhi rezulton pronar i Anmetal, kompani që, sipas investigimit të Pamfletit, ka përfituar rreth 21 milionë euro kontrata publike me TVSH. Burimet e redaksisë kanë ngritur dyshime se hetimet mund të përfshijnë edhe pasurinë dhe interesat ekonomike të familjes së deputetes.

Elbasani ka nevojë për një drejtim tjetër autoritar, jo për xhambazë të rinj politikë
Elbasani është kthyer në një problem serioz politik për Edi Ramën. SPAK ka dokumentuar një organizatë kriminale që synonte kontrollin e territorit dhe kishte depërtuar në institucionet shtetërore. Hetimet për zgjedhjet kanë nxjerrë skema të dyshuara me ndihmën ekonomike dhe punimet publike, ndërsa denoncimet mbi biznesmenët kanë ekspozuar marrëdhënie të diskutueshme mes parave dhe pushtetit.

Elbasanit i duhet një ndryshim rrënjësor në drejtimin politik të qarkut, me një person që ka ndikim dhe autoritet, pa qenë nevoja që kryeministri të ulet në gjunjë para bandave kriminale për të siguruar karrigen dhe votat e partisë.

Rama ka mundësinë ta ndryshojë këtë model, por për sa kohë drejtimi politik mbështetet te të njëjtat rrjete interesash, çdo ndryshim rrezikon të mbetet një pazar tjetër për pushtetin. /Pamfleti