Poetja Mimoza Ahmeti ka komentuar figurën e kryeministrit Edi Rama, duke u shprehur se ai eshte një person shume i zgjuar, por që sipas saj, një nga gabimet e kreut të qeverisë ka qenë përqendrimi i tepërt te marrëdhëniet ndërkombëtare, duke lënë pas dore zhvillimet e brendshme të vendit.
Sipas poetes, ndryshimet që Rama ka sjellë në Shqipëri janë të dukshme tesa theksoi se “ka mbajtur shumë topa” në politikën ndërkombëtare duke ndikuar në krijimin e ekuilibrave në Ballkan dhe më gjerë.
“Që ai është një person shumë i zgjuar, kjo është e vetëkuptueshme. Që ai ka bërë shumë ndryshime në këtë vend, është e vetëkuptueshme. Edhe në politikën ndërkombëtare ai ka luajtur dhe ka mbajtur në ajër shumë topa, të cilët kanë sjellë shumë ekuilibra në Ballkan dhe gjetkë”, është shprehur Ahmeti.
Më tej, poetja ka theksuar se pikërisht përqendrimi i madh te marrëdhëniet me jashtë ka qenë një nga aspektet që nuk ka funksionuar siç duhet në drejtimin e tij.
“Ai është karizmatik dhe sharmant. Ajo që nuk shkoi mirë me të, mendoj, është se u lidh tepër me marrëdhëniet ndërkombëtare, të cilat në ditët e sotme janë shumë të rëndësishme, sepse kriza e globalizmit është në një nivel shumë të lartë. Pra, gjithë tensionin, investimin shpirtëror apo material e përqendroi në këto marrëdhënie dhe la pas dore mjedisin e brendshëm, vendin e tij”, ka deklaruar ajo.
Sipas Ahmetit, Rama mund të kishte bërë më shumë për përmbushjen e dëshirave dhe pritshmërive të shqiptarëve. Ajo ka ngritur gjithashtu pikëpyetje mbi faktin nëse kryeministri e ka parashikuar që dobësitë në planin e brendshëm mund të shfrytëzoheshin politikisht nga forca të tjera.
“Ai mund të kishte përmbushur dëshirat e shqiptarëve edhe më shumë, mendoj. Ndoshta ai nuk e mendoi kurrë se një ditë kjo dobësi mund të përdorej si kapital nga forca të tjera, sepse mendonte: ‘Përderisa bota nuk e merr parasysh, pse duhet ta marr unë parasysh?’ Por e shihni se si funksionon kjo në ekonominë e hapësirës: nuk mund të shpërfillësh asgjë, gjithçka mund të përdoret nga forca që janë më të mëdha se ti”, ka përfunduar Mimoza Ahmeti.
