Një ngjarje e rëndë ka ndodhur ditën e djeshme në një kantier ndërtimi në Via Coletti, në Rivabella, ku një shtetas shqiptar ra nga skela gjatë punës dhe vdiq në vendngjarje. Viktima mësohet se është shqiptari i identifikuar si Saim Myrtaj, 59 vjeç, me origjinë shqiptare.
Sipas mediave italiane mësohet se aksidenti tragjik ka ndodhur rreth orës 13:30 të së hënës. Myrtaj ishte mbi skelat e ngritura përgjatë fasadës së jashtme të një ndërtese dykatëshe, ku po zhvilloheshin punime mirëmbajtjeje, veçanërisht në tarraca dhe kornizë.
Referuar të dhënave paraprake, pasi bëhet me dije se hetimet për zbardhjen e plotë të ngjarjes janë akoma në vijim ,Myrtaj vetëm në katin e dytë të skelës kur papritmas ra nga skela. 59-vjeçari mësohet se rrëshqiti mes hapësirës së skelës që përdorej për të kaluar shkallët midis një kati dhe tjetrit.
Ka qenë qiramarrësi i godinës në fjalë personi që dha alarmin. Me të dëgjuar një zhurmë të fortë nga jashtë, ai doli menjëherë për të parë se çfarë kishte ndodhur. Pasi kuptoi tragjedinë, qiramarrësi telefonoi menjëherë autoritetet vendase të cilat u vunë në lëvizje për të zbardhur rrethanat e plota të ngjarjes.
Po ashtu bëhet me dije se Prokuroria e Riminit ka hapur një hetim për vrasje të paqëllimshme kundër personave të panjohur për të hedhur dritë mbi vdekjen e shqiptarit. Por pritet që autopsia të zbardhë të vërtetën.
Dhimbja e madhe ka pllakosur familjen Myrtaj, pasi shtylla kryesore e familjes u nda tragjikisht nga jeta duke lënë pas gruan dhe dy fëmijë, një djalë dhe një vajzë.
Comments are closed.