Mjekja Aurora Dollenberg ka ngritur shqetësimin për përhapjen e viruseve gjatë këtij sezoni, duke theksuar se vala e gripit ka nisur më herët se zakonisht dhe po shoqërohet me raste më të rënda dhe komplikacione. Në një intervistë, ajo tha se në Gjermani rastet kanë ardhur në rritje gjatë javëve të fundit, duke mbingarkuar poliklinikat dhe shërbimet ambulatore.
Sipas Dollenberg, gripi i këtij sezoni po prek të gjitha grupmoshat, por më të rrezikuar mbeten fëmijët dhe të moshuarit. Ajo vuri në dukje se edhe persona pa sëmundje shoqëruese po raportojnë simptoma më të forta dhe një kohëzgjatje të pazakontë të sëmundjes, që në disa raste kalon dy deri në tre javë.
Mjekja u ndal edhe te nënvarianti i gripit H1N1, për të cilin tha se po raportohet në disa vende të Europës, përfshirë Gjermaninë dhe Shqipërinë. Sipas saj, ndryshimet gjenetike të virusit kanë ngritur shqetësime për efektivitetin e vaksinës së përgatitur në fillim të vitit, ndërsa theksoi se mungojnë të dhënat e plota për monitorimin e varianteve në Shqipëri.
Dollenberg përshkroi disa nga simptomat që po shoqërojnë rastet e këtij sezoni, mes tyre dhimbje të forta të fytit, temperaturë që mund të kalojë 39 gradë, dhimbje të theksuara muskulare dhe lodhje të madhe. Ajo paralajmëroi se neglizhimi i simptomave mund të përkeqësojë gjendjen dhe se në disa raste pacientët kanë nevojë për qëndrim të zgjatur në regjim shtrati.
Mjekja bëri apel që personat me simptoma të qëndrojnë në shtëpi, të shmangin kontaktet me të tjerët dhe të mos shkojnë në punë apo të kryejnë aktivitete sportive gjatë sëmundjes. Ajo këshilloi gjithashtu pushim, marrje të mjaftueshme të lëngjeve dhe kujdes të shtuar ndaj shëndetit, veçanërisht gjatë periudhës së dimrit.
Sipas saj, virusi përhapet përmes spërklave gjatë kollitjes dhe teshtitjes, por edhe përmes sipërfaqeve të kontaminuara, duke favorizuar përhapjen në shkolla, kopshte dhe ambiente pune.
Aurora Dolenberg: Mirëmëngjesi, mirë se ju gjeta. Është e vërtetë që vala e gripit këtu në Gjermani ka filluar madje prej më pak se dy-tre javësh. Pra kemi një startim të hershëm të sezonit të gripit dhe me një rritje nga dita në ditë të rasteve me komplikacione. Poliklinikat e ambulancat, pra pjesa ambulatore, është patjetër e mbingarkuar me pacientë të të gjitha grupmoshave. Dominojnë si gjithmonë fëmijët, grupmoshat e moshuara, por patjetër edhe të rriturit që nuk kanë asnjë faktor rreziku dhe që nuk kanë sëmundje shoqëruese raportojnë që si gripin e këtij viti nuk e kanë përjetuar ndonjëherë deri tani. Çuditërisht, me e vërtetë gripi zgjat më tepër se sa atë që e njohim, një javë simptoma gripi e njohim, gripi i këtij viti zgjat më shumë se sa dy-tre javë, është shumë herë më agresiv dhe ka filluar më
Në qoftë se në vitet e kaluara kemi pasur si sfidë kryesore gjithmonë Covid-in, prodhimin e vaksinës së tij dhe tani kemi arritur në atë pikë të ecurisë virologjike që është bërë gripi më i rrezikshëm se të gjitha infeksionet e tjera virale, qoftë Covid-i ose viruset e tjera, sepse e njohim dhe nga e kaluara që shpërthimet endemike ose dhe epidemike të gripit nuk janë të rralla. E dimë shumë mirë që influenca A, B që janë ato të zakonshmet, e kanë një vaksinë mbrojtëse, prandaj ndaj këtyre varianteve të gripit nuk i kemi si sfidë. Por, ju e përmendët dhe variantin H1N1 i cili është ndër ato që po bëjnë problem momentalisht, jo vetëm këtu në Gjermani por në mbarë Europën, përfshirë dhe në Shqipëri me rastet qoftë të identifikuara apo dhe rastet e errëta shifrat e errëta që nuk e dimë që janë pozitiv.
Dhe ky variant i ri për fatin e keq i ka bërë surpriza asaj vaksine që është prodhuar në fillimin e këtij viti si parandalim për vjeshtën dhe për dimrin, ndaj gripi. Që do të thotë vaksina aktuale që po jepet ndaj gripit nuk ka asnjë efikasitet ndaj varianteve të reja të H1N1, duke bërë që pikërisht të moshuarit, ato që janë të rrezikuar për t’u prekur nga një grip i rëndë, ata shndërrohen në burim infeksioni dhe përhapin më shpejt në komunitet.
Në Gjermani kemi Institutin e Robert Koch i cili është ai radari i infeksioneve që i mbledh në mënyrë epidemiologjike dhe bën kërkime shkencore të vazhdueshme në sa i përket varianteve të ndryshme gjenetike të këtij gripi. Në Shqipëri për fatin e keq ky stadi i kërkimit shkencor në popullatë dhe marrjes së mostrave për të parë nëse ka ndryshime gjenetike për fatin e keq nuk është i dhënë, prandaj jemi të detyruar si Shqipëri të marrim. Pikërisht, pra mblidhen vetëm statistika por nuk kemi të dhëna që në Shqipëri të bëhen dhe kërkime për variantet e reja gjenetike. Prandaj mund të themi që si kudo, pjesa tjetër e Europës madje dhe Amerika e ka raportuar para disa javësh që edhe aty varianti H1N1 ka bërë probleme, qoftë me më tepër komplikacione, me ecuri më të rënda.
Dhe të njëjtën ecuri të gripit po shohim dhe këtu në Europë. Frankenshtajni është i njohur i ngjalluri nga të vdekurit, që do të thotë të njëjtën gjë po bën dhe ky virusi i gripit i cili faktikisht pa bujtësin e tij që është trupi i njeriut nuk mund të jetojë. Prandaj në momentin që ky virus dhe materiali i tij gjenetik zakonisht i zharavitur futet në qelizat e organizmit njerëzor, aty ringjallet duke treguar një fytyrë të frikshme si ajo e Frankenshtajnit, sepse me të vërtetë e themi lehtë ashtu gjithmonë ‘hë se është vetëm grip’, por e vërteta është që gripi i këtij viti me të vërtetë mund të bëhet edhe për ata që kurrë nuk kanë patur sëmundje infektioze i rrezikshëm. Dhe në qoftë se simptomat karakteristike të këtij gripi i injorojmë, një ndër to të variantit Frankenshtajn është fyti brisk, pra prerja dhe dhimbja e fytit e bajameve në një formë që edhe infeksionet bakteriale shumë rrallë e shkaktojnë, me këtë intensitet dhimbje si të prisnim fytin pra me një brisk.
Temperaturat e larta që nuk është tipike për viruset tek të rriturit, pra 39 gradë dhe sipër. Fakti që dhimbjet muskulare i njohim gjithmonë, që kemi këputje, kemi dhimbje muskujsh, por varianti Frankenshtajn me të vërtetë bën që pacienti dy javë të jetë të ketë regjim shtrati dhe me të vërtetë nuk ka aftësi as për punë. Kështu që e bëj gjithmonë apelin, ata që kanë simptoma gripi, të lehtë por edhe të variantit Frankenshtajn që janë më të rënda, duhet të qëndrojnë në shtëpi për të mbrojtur dhe të tjerët. Është një nënvariant, është një ecuri e ndër atyre varianteve të fundit të Omicronit i cili ka përparuar nga ana gjenetike dhe që mund të shfaqet edhe me simptoma më të rënda se ç’i kemi pasur. Patjetër dhe hospitalizimi dhe rastet e komplikacioneve tek ky variant i ri janë më të shtuara, por këto i rezervohen vetëm një përqindje të ulët për fatin e mirë në popullatë.
Të paktën nga komunikimet qoftë edhe me kolegët e mi por edhe me kolegë të tjerë, të miqtë, mjekë, pacientë, me të vërtetë ky variant i gripit ka treguar një agresivitet shumë herë më të rritur nga ç’e njohim nga gripi i zakonshëm edhe i padëmshëm në thonjëza. Pra edhe këtu në Gjermani pacientët që mund të kishin me pushime në Shqipëri, kur vijnë i shkruaj për disa javë raport mjekësor, gjë që nuk ka ndodhur në vitet e kaluara që diagnoza për katër javë ose dhe më tepër të shënojë grip, sepse nuk është tipike për atë gripin e lehtë. Prandaj dhe që në fillim ai apeli që sapo e nisa, shumë pacientë e neglizhojnë se mendojnë që kalon, pas tre ditësh do të kemi një përmirësim nga një grip i zakonshëm, ky grip kalon më tepër se sa dy javë dhe nuk ka përmirësim.
Prandaj që në fillim duhet faktikisht izolimi, duhet regjimi trupor me idenë e marrjes së lëngjeve tre litra të paktën në ditë, me një dozë të shtuar të vitaminës C, regjim shtrati, nënkuptojmë patjetër heqjen dorë nga sporti, nga vajtja në punë. Pra, duhet një përkujdesje më të shtuar nga çfarë e njohim zakonisht. Duke qenë se nuk kemi një mbrojtje paraprake, pra imuniteti ynë natyral është pothuajse zero në të gjitha grupmoshat dhe vaksina për ato moshat e rrezikuara nuk ka efikasitet ndaj variantit të ri të gripit, kemi patjetër një përhapje më të shpejtë. Që do të thotë që është më ngjitës. Me anë të spërklave të ajrit në momentin që kollitemi ose që këto spërkla të pështymës mbërrijnë në sipërfaqe të caktuara, të mobiljeve, të tavolinave të punës ose nëpër kopshte nëpër shkolla, në ato sipërfaqet ku nxënësit dhe fëmijët kanë kontakt, kjo bën që në një kohë të shkurtër të kemi një numër të lartë të infektuarish.
Dhe prandaj dhe është një sensibilitet i rritur qoftë nga OBSH-ja por dhe nga vetë Ministritë Nacionale të vendeve evropiane, që nuk duhet neglizhuar gripi i këtij viti, sepse masat mbrojtëse janë shumë të ulëta dhe ecuria gjenetike e tij bën që të paraqitet në mënyrë të papritur. Kjo është një nga karakteristikat e këtij gripi që dje ishin komplet të shëndetshëm dhe sot jemi me temperaturë, me dhimbje fyti si brisk e përmendëm disa herë, me dhimbje muskulare të jashtëzakonshme, pra është shumë fulminant nga prezantimi klinik, dhe zgjat, kur themi që është fulminant presim që pastaj pas një jave të jemi përsëri në këmbë dhe të vazhdojmë punën dhe funksionalitetin, por jo vetëm që fillon në mënyrë të rrufeshme por zgjat në mënyrë të tejzgjatur. Vitamina D është protagonisti gjithmonë i dimrit dhe forcuesi kryesor, mund ta quajmë, i sistemit imunitar në mënyrë afatgjatë.
