Reshjet e shiut do të jenë prezente në pjesën më të madhe të javës në vendin tonë, me intensitet më të lartë në veri të Shqipërisë. Në zonat qendrore dhe jugore priten kryesisht shtrëngata dhe rrebeshe afatshkurtra, ndërsa meteorologët paralajmërojnë se ditët me më shumë reshje do të jenë e premtja dhe fundjava.
Sipas parashikimit, reshjet do të shfaqen herë pas here gjatë gjithë 24-orëshit, me ndërprerje të përkohshme dhe rikthim të vranësirave. Dita e martë pritet të jetë më e qetë, veçanërisht në qendër dhe në jug, ku do të ketë më shumë momente me pika shiu. Në veri, megjithatë, reshjet do të vijojnë me intensitet deri mesatar.
E mërkura rikthen reshjet, e enjtja me më pak shi
Të mërkurën pritet sërish shtim i vranësirave dhe reshjeve në territor. E enjtja do të sjellë një tjetër interval me më pak reshje, por përmirësimi nuk do të zgjasë shumë.
Sipas sinoptikanëve, reshjet do të intensifikohen të premten dhe gjatë fundjavës, kur rrebeshet pritet të përfshijnë pjesën më të madhe të vendit.
Temperaturat rriten nga e mërkura, termometri deri në 25°C
Pavarësisht motit të lagësht dhe reshjeve, temperaturat do të pësojnë rritje nga dita e mërkurë. Fillimi i javës do të jetë më i freskët, ndërsa më pas masat ajrore të ngrohta do të ndikojnë si në vlerat minimale, ashtu edhe në ato maksimale.
Termometri pritet të ngjitet në 24 deri në 25 gradë Celsius, duke sjellë një javë relativisht të ngrohtë për këtë periudhë.
Meteorologët e cilësojnë situatën si tipike vjeshtore: temperatura të buta, lagështi të lartë dhe reshje të herëpashershme, ku nuk do të mungojnë as rrebeshet.
Nëntori është ndër muajt me më shumë ditë me reshje në Shqipëri, ndaj moti i paqëndrueshëm pritet të vijojë edhe gjatë ditëve në vazhdim.
