Lëvizjet e muajit shtator dhe rritja e trysnisë mbi drejtësinë priten të sjellin zhvillime të reja në SPAK. Avokati Leonard Karaj dhe analisti Roland Bejko kanë analizuar në “Ntv Televizion”, sfidat, pritshmëritë publike dhe rolin e mbështetjes amerikane në punën e strukturës antikorrupsion. Sipas avokatit Leonard Karaj, prova e vërtetë e suksesit për SPAK-un do të jetë shndërrimi i Ergys Agasit në një të penduar të drejtësisë. Ai u shpreh se nëse kjo arrihet, SPAK do të merrte notën maksimale, pasi Agasi mund të shërbejë si çelësi që hap të gjitha dyert e politikës, nga AKSHI, deri te Kryeministria.
Më tej, Karaj paralajmëroi se nëse ky bashkëpunim dështon, Agasi rrezikon të lirohet për shkak të kalimit të afateve të paraburgimit, gjë që sipas tij do të tregonte dështim të strukturës antikorrupsion. Karaj ngriti gjithashtu pyetje mbi mënyrën se si zyrtarë të lartë arrijnë të krijojnë pasuri të mëdha me rroga shteti, duke marrë si shembull denoncimet e PD-së për ministren Mirela Kumbaro dhe numrin e madh të apartamenteve në pronësi të saj, çështje me të cilat sipas tij duhet të merret hetimi zyrtar. “PD zbuloi se ministrja Mirela Kumbaro ka shtatë apartamente.
Një ministër i cili e ka rrogën sa e ka, 3 milionë lekë të vjetra? Po sikur të mos hajë, mos pijë, mos vishet, mos shkojë, mos bëjë pushime… Mund të ma shpjegoni se si mund t’i bëjnë shtatë-tetë apartamente këta njerëz? Pra SPAK me këta duhet të merret. “Kapa atë kriminelin” thotë SPAK. Në qoftë se arrijnë që Ergys Agasin ta bëjnë të penduarin e drejtësisë, atëherë unë do t’i them SPAK-ut që ti e ke notën 10 këtu, sepse Ergysi teorikisht mund të jetë, le të themi, ai çelësi kopil që hap të gjitha dyert e politikës të AKSHI‑t, kryeministrisë e të gjithë. Në qoftë se nuk arrin ta bëjë këtë, Ergys Agasi do të dalë si Vangjush Dako për shkak të kalimit të afateve të paraburgimit. Nëse kjo ndodh, atëherë vendosi kyçin SPAK-ut, sepse edhe ishim shumë herë më mirë te Krimet e Rënda që kishim”, u shpreh ndwr tw tjera avokati Leonard Karaj.Mbështetja e SHBA ndaj SPAK
Nga ana tjetër, Roland Bejko theksoi se perceptimi publik për korrupsionin e qeverisë është rritur pikërisht falë punës së SPAK-ut, megjithëse pritshmëritë e qytetarëve janë shumë më të larta se mundësitë reale. Ai sqaroi se mbingarkesa me dosje dhe mungesa e burimeve njerëzore e pengojnë ritmin e punës, por shtoi se ardhja e oficerëve të rinj të BKH-së do ta lehtësojë procesin hetimor. Lidhur me faktorin ndërkombëtar, Bejko nëvizoi se mungesa e gjatë e ambasadorit amerikan ndikoi negativisht në ritmin e hetimeve.
Megjithatë, ai vlerësoi se ardhja e diplomatit të ri amerikan tani në shtator do ta inkurajojë më shumë SPAK-un për të guxuar dhe për të goditur figurat e larta të pushtetit. “Më Shqipëri ka aq shumë korrupsion saqë, nëse do që ta kritikosh SPAK-un, natyrisht e kritikon. Pritshmëria është rritur aq shumë saqë ndoshta nuk është në përpjesëtim të drejtë ajo çka ka bërë SPAK‑u me pritshmëritë që kanë qytetarët.Natyrisht, ata operojnë me mjetet e tyre dhe ata kanë shprehur ankesat e tyre për mungesën e burimeve njerëzore, mungesën e mjediseve, mungesën e infrastrukturës e të tjerë. Të gjitha këto e pengojnë punën e SPAK-ut, sepse atje dosjet janë bërë kapicë, njerëz pak. Tani po bëjnë konkursin për pranimin e oficerëve të BKH-së dhe nuk janë pak ata që do të shkojnë. Domethënë, ata do ta lehtësojnë jashtëzakonisht shumë procesin hetimor të dosjeve. Por kjo nuk mjafton, sepse tek e fundit gjithçka që çon SPAK‑u në gjykatë, gjykata pastaj është e pavarur. Gjykata merr vendimet e saj dhe kjo puna e interpretimit është edhe subjektive, sepse ligji ta jep ashtu, po ta jep edhe kështu. Pse e thonë, si e ka lexuar ligji. Ka rekorde jashtëzakonisht shumë pozitive të SPAK.
Tek e fundit falë punës së SPAK-ut është krijuar edhe perceptimi qytetar që kjo qeveri është super e korruptuar. Ka dalë që ka ndaluar dhe ka kapur edhe klientët ose, le të themi, partnerët e figurave opozitare që janë në terren, oligarkë etj. Pra, të gjitha këto, kjo ka dhënë atë perceptimin politik. Prandaj, po ta vësh re në protestë, protestuesit, sidomos ditët e fundit, artikulojnë dhe i thonë SPAK-ut: ‘goditi’, sepse kështu na ndihmon edhe ne të realizojmë objektivat tona që janë dorëheqja e qeverisë, mbyllja e kapitullit të politikës së vjetër për të ndërtuar Shqipërinë e re etj. Të gjitha këto i kërkohen si ndihmë SPAK-ut.Por ka edhe një faktor tjetër. Unë mendoj që, duam s’duam ne, se kush e bëri SPAK-un…Kryesisht ishte vullneti i qytetarëve shqiptarë, dëshira e tyre që e donin një drejtësi të re dhe ishte imperativ i kohës. Por Shtetet e Bashkuara të Amerikës ishin ato dhe Bashkimi Europian që e mbështetën SPAK-un, apo që e inkurajuan, e mbështetën e të tjerë. Largimi i ambasadores dhe krijimi i këtij boshllëku prej tre vjetësh bëri që ndoshta edhe tek ata të bjerë pak tempi, ritmi. Ndërrimi i drejtuesit të SPAK-ut… Unë s’kam asgjë me zotin Braho.
Përkundrazi, kam të njëjtat konsiderata si zoti Dumani, por zoti Dumani si duket sapo kishte krijuar një lloj ritmi të tij dhe kishte disa çështje të cilat shkonin paralelisht edhe me atë çfarë donte edhe publiku që të shikonte, domethënë të priste prej SPAK-ut, sepse duhet të jemi të kujdesshëm në gjetjen e fjalëve në këtë rast. Ardhja e ambasadorit të ri amerikan, më tepër që është gjeneral, kam përshtypjen që do ta inkurajojë edhe më shumë SPAK-un. Tjetër gjë kur e ke këtu bariun dhe tjetër gjë kur bariu ka ikur në një dasmë dhe ujqërit sillen të lirë. Por SPAK duhet të guxojë edhe më shumë”, u shpreh ndër të tjera Roland Bejko.
Comments are closed.